VIGAN CITY – Agtultuloy ti imbestigasyon dagiti pannakabagi ti linteg iti Sinait Police Station iti napasamak a pammaltog idiay Barangay Ricudo, Sinait a nakatayan ti biktima a ni Ritchie Agdeppa Ilustrisimo, alyas Hapon, agtawen iti tallopulo ket siam, maysa a drug surrederee.
Iti pannaki-uman ti Bombo Radyo Vigan ken ni Police Chief Master Sergeant Danny Alejo Maligsay, ti biktima ket mamonmonitor pay gapu ti pannakainaigna iti iligal a droga ta mapapati a sinublianna ti iligal nga aramidna agsipud ta idi kallabes ket dimmalan payen iti rehabilitation.
Maipalagip nga agmaymaysa nga agin-inom ti biktima iti uneg ti pagtaenganna idi simrek ti saan a mabigbig a suspek a nangpaltog iti biktima a puon ti nakatayanna.
Innayon ni Maligsay a tallo nga NMAX a motorsiklo ti inusar dagiti suspek.
Malaksid dayta, kitkitaenda pay met no adda pakainaigan ti pannakapaltog ti biktima iti pannakairamanna idi kallabes iti kaso a frustrated murder.
