VIGAN CITY–Balligi iti pannakaisayangkat iti search operation iti pagtaengan ni Man-man Olivar, agtawen iti dua pulo ket walo, baro, awanan iti trabaho, maysa a drug surrenderee ken agnaed idiay Brgy Daclapan, Cabugao, babaen iti nagtitipon a puwersa dagiti operatiba manipud ti Cabugao municipal police station, Ilocos Sur Police Provincial Office ken Philippine Drug Enforcement Agency.
Iti nasao nga operasyon ket babaen iti bisa ti search warrant a naiparuwar iti sala ni Hon. Judge Raphiel Alzate ti RTC Branch 24, Cabugao, Ilocos sur, 1st Judicial Region.
Naala kenkuana iti maysa a bassit a tupperware a naglaon iti medium heat sealed transparent plastic sachet a naglaon iti mapapati a shabu, dua nga improvised lighter, dua nga improvised glass tooter ken maysa nga elongated aluminum foil, kasta pay iti maysa nakarolyo nga aluminum foil, tallo nga small heat sealed transparent plastic sachet ken lima nga used elongated aluminum foil nga adda iti mapapati a shabu residue na.
