Vigan City – Naballigi iti pannakaisayangkat iti Anti-Drug Operation nga inwayat dagiti pannakabagi ti linteg idiay Sacuyya Norte, Santa idi kalman kas pinasingkedan ni PCapt. Richard Cario a hepe ti Santa Municipal Police Station.
Iti pannaki-uman iti Bombo Radyo Vigan ken ni Cario, kinunana a ti suspek ket ni Gerry Corpuz, agtawen ti lima pulo ket innem, naasawaan, negosyante, Top 8 PDEA Provincial Target List ken subject iti COPLAN Stone Cold ken agnaed iti nasao a lugar.
Segun ken ni Cario, kaso a panaglabsing iti RA 9165 ken RA 10591 iti sanguen ti suspek a datin a natiliw idi tawen 2016 iti isu met laeng a kaso ngem nakapagpyansa.
Naala ken ni Corpuz ti maysa a medium ken siam a heat sealed transparent plastic sachet nga addaan iti mapapati a shabu nga agdagsen iti dua a gramo ken aggatad iti dua pulo a ribo a pisos, fragmentation grenade, maysa a caliber 38 revolver, dua a bala iti cal. 38 a paltog, tallo a fired cartridges iti cal.38, sangapulo ket dua a bala iti cal. 45, pito a bala iti cal. 5.56 ken maysa a bala iti shotgun.
