VIGAN CITY – Kaso a panaglabsing ti Republic Act 9165 wenno Comprehensive Dangerous Drugs Act of 2002 ti sangwen ni Noel Juan Albalos, agtawen ti uppat a pulo ket uppat nga agnaed iti Don Dimas Querubin, Caoayan a nakemmeg iti naiwayat nga anti-illegal drug operation.
Segun kenni Police Captain Henry Garcia, hepe ti Caoayan Municipal Police Station, newly drug personality ti suspek ken mapapati a drug pusher laeng ta negatibo iti resulta ti dimmalananna a drug test.
Makabulan a binambantayan dagiti pannakabagi ti linteg ti suspek ken im-imbestigarandan no siasino ti pangal-alaanna dagiti iligal a droga.
Naala kenkuana ti maysa a transparent heat sealed plastic sachet a naglaon iti shabu nga isu ti nagserbi a buy bust item, tallo a transparent heat sealed sachet a naglaon ti shabu nga ikot ti suspek nga agdagsen iti maysa a gramo ken aggatad iti duaribo limagasut a pisos, maysa a bala ti caliber 40 ken limagasut a pisos.
No pay kasta, nakakustodiyan ti suspek iti Caoayan Police Station tapno dumalan iti usto a proseso.
