Nadunor iti nadumaduma a paset ti bagi ti nagmaneho ti tricycle ta aksidente a nadungpar ti maysa nga SUV iti national highway idiay Barangay Paing, Bantay, Ilocos Sur itay alas nuebe kuarentay singko iti bigat, August 20, 2024.
Ti nagmaneho ti Isuzu Crosswind a color satin silver ket ni Melvin Tangliban Salundaguit, agtawen iti uppat a pulo, naasawaan, electrician, addaan driver’s license nga agnaed idiay Allangigan Primero, Candon City idinto a ti nagmaneho ti tricycle ket ni Ronald Nuñez, agtawen iti uppat a pulo ket maysa, naasawaan, holder iti professional driver’s license nga agnaed idiay Barangay Sinabaan, Bantay.
Iti pannaki-uman ti Bombo Radyo Vigan ken ni PCpt. Sherwin Beroña manipod Deputy Chief of Police iti Bantay Municipal Police Station, maibasar ti CCTV footage a naala manipod Municipal Disaster Risk Reduction and Management Office – Bantay ket agpaaamianan a direksyon ti SUV idinto nga aggapu iti bangir a direksyon ti tricycle idin kellaat a nag-U-turn iti tricycle isu a nadungpar iti SUV.
Segun ken ni Beroña, nadundunor ti driver iti traysikel isu a naipan iti Metro Vigan Cooperative Hospital para iti pannakatamingna ket iti agdama maobobserbaran pay laeng ti kasasaadna ta pasaray agulaw idinto a ti driver iti SUV ket saan a naan-ano ngem naipan iti Ilocos Sur Provincial Hospital – Gabriela Silang.
Naisayangkaten ti pakpaka-una a panagsarita dagiti karaman iti aksidente ket ingkari ti driver ti SUV a tulonganna ti driver iti tricycle para iti panagpaagasna ket manamnama nga agsaritada pay inton August 22.
Palagip ni Beroña kadagiti motorista iti kanayon a panagan-annad tapno saan a mainaig iti aniaman nga aksidente.
VIDEO – PCAPT. SHERWIN BEROÑA
