Nadunor ti nagmaneho iti motorsiklo kalpasan a nakadinnungparna ti tricycle iti national highway idiay Barangay Vical, Sta. Lucia.
Ti nagmaneho ti Black Barako Tricycle ket lalaki nga agtawen iti uppat a pulo ket maysa, addaan ti driver’s license nga agnaed idiay Barangay Vical, Sta. Lucia.
Ti met nagmaneho iti Black Euro motorcycle ket lalaki nga agtawen iti uppat a pulo ket dua, cooperative technician, addaan ti driver’s license nga agnaed idiay Barangay Maynganay Sur, Sta. Maria.
Agpapabagatan a direksyon ti motorsiklo idinto nga adda iti west shoulder lane ti naka-tricycle idin nadanonda iti nasao a lugar ket kellaat a simrek iti national highway ti tricycle nga agpapadaya a direksyon ngem naidungpar iti nakamotorsiklo.
Gapu dayta ket nadunor ti driver ti motorsiklo isu a naipan iti Ilocos Sur Medical Center, Candon City, Ilocos Sur idinto a saan a naan-ano ti driver ti tricycle.
