Nadunor ti driver ti motorsiklo kalpasan a natukbobna ti nakamotorsiklo a sarsarunwenna iti Suyo-Cervantes Road, Sitio Doccos, Barangay Uso, Suyo, Ilocos Sur.
Ti nagmaneho ti Green Euro 150 Viper motorcycle ket lalaki nga agtawen iti sangapulo ket siam, awanan ti driver’s license nga agnaed idiay Sitio Kinapian, Barangay Suyo Proper, Suyo.
Ti nagmaneho met iti Red Rusi Macho 150 motorcycle ket agtawen iti sangapulo ket innem, out-of-school youth, awanan ti driver’s license nga agnaed idiay Sitio Kinapian, Barangay Suyo Proper, Suyo.
Segun ti witness, agpada nga agpapadaya a direksyon dagiti dua a lugan a ti akin-sango ket ti Rusi, idin nadanonna iti nasao a lugar ket nagin-innayad ti Rusi ta napansinna ti agop-operate a backhoe ngem saan a napansin dagus ti nagmaneho ti Euro isu a natukbobna ti Rusi.
Gapu dayta ket nadunor ti nagmaneho ti Euro idinto a saan a naan-ano ti driver Rusi ngem agpadada latta a naipan iti Ilocos Sur District Hospital, Barangay Bio, Tagudin para iti medical treatment.
