Nadunor ti driver ti motorsiklo kalpasan a naidungpar iti electric bike iti national highway idiay Barangay Panay Norte, Magsingal, Ilocos Sur itay bigat, June 30, 2026.
Ti nagmaneho iti Matte Blue Yamaha Mio i125 motorcycle ket lalaki nga agtawen iti duapulo ket uppat, construction worker nga agnaed idiay Barangay Immayos Norte, San Juan.
Ti met nagmaneho iti Summer Electric Bike ket babai nga agtawen iti tallopulo ket dua nga agnaed idiay Barangay Napo, Magsingal.
Agpada nga agpapabagatan a direksyon ti dua a lugan idin nadanonda iti nasao a lugar ket nagin-innayad ti e-bike a nagsikko iti kannigid.
Iti dayta a gundaway ket impadas ti nakamotorsiklo a nag-overtake iti e-bike ngem nadungparna iti akin-kannigid a paset iti nasao nga e-bike.
Gapu dayta ket nadunor iti agduduma a paset ti bagi ti driver iti motorsiklo idinto nga agalen ti nasakit nga ulo ti driver ti e-bike isu a naipanda iti Ilocos Sur District Hospital – Magsingal para iti pannakatamingda.
