VIGAN CITY – Agtaltalinaed iti ospital ni Christopher Klein Udaundo Oroceo, agtawen ti tallopulo ket innem a taga-Nagrangtayan, Sachez Mira, Cagayan ta nabansag bayat ti panagmanehona ti Mitsubishi closed van iti national highway idiay Brgy. Napo, Magsingal, Ilocos Sur.
Iti pannaki-uman ti Bombo Radyo Vigan ken ni PCpl. Emmanuel Reolalas iti Magsingal Municipal Police Station, saanda pay laeng a nabigbig dagiti dua a lallaki a nagkalubbon ti motorsiklo a nangbansag ti bote ken ni Oroceo ta idi napanda kadagiti establishyimento nga adda CCTV-na ket saan nga agbalin wenno defected, saan a nakalukat, blurred ken nasipnget iti pannakaalana iti pasamak.
Segun ken ni Reolalas, nagsagaba ti dunor ti biktima kangrunaan ti rupa ken matana idinto a saan a naan-ano ti pahinantena a kaduana idi napasamak ti insidente.
Nupay kasta, agtultuloy ti imbestigasyon ti PNP ken namnamaen ni Reolalas a sumukonto met laeng dagiti suspek tapno matulonganda ti biktima para iti panagpaagasna ditoy probinsia.
Maipalagip nga idi alas onse iti rabii ti January 26 iti agdama a tawen bayat ti panagturong ti amianan a direksyon ti closed van ket adda ti nangbansag a nagkalubbon ti motorsiklo a gappuanan ti pannakadundunor ti driver ti nasao a van.
