VIGAN CITY -Manarimaan iti imbestigasyon dagiti otoridad iti pammaltog idiay Namit-ingan, Dolores, Abra a nakatayan ni Larry Tanura Baldemor nga agtawen iti uppat a pulo ket lima, driver ti ambulansya idiay San Juan, Abra.
Naamuan nga agin-inom ti biktima iti pagtaengan iti agnagan ti Christine Jane idi alas singko ti malem idi January 16 idi adda ti saan da a nagkinnaawatan ti kasinsin na a ni Arnel Tagudar nga agtawen iti tallo pulo ket dua ket tinungpa ti biktima ni Tagudar ngem adda ti nanganawa kadakuada.
Alas onse kwarenta y singko ti rabii idi kalman idi pimmanaw ti biktima iti lugar a naginuman na agingga a nakangngeg laengen dagiti agnaed iti nasao a lugar iti putok ti paltog ket nakita da ti biktima nga agtartaray nga adda tama iti paltog iti boksit na agingga a natulid iti nagsardengan na.
12 gauge shotgun iti mapapati a naaramat iti pammaltog isu nga uray nu maysa laeng a tama iti paltog ti sinagrap ti biktima ket siyam a pellet hole iti sinagaba na.
