VIGAN CITY – Saanen a makasoan iti drayber ti Isuzu 14-wheeler-truck a ni Ariel Naldo, agtawen ti tallo pulo ket siam a taga-Mabalacat, Pampanga a nakadungpar ken ni Felipe Rendon Jr, agtawen ti duapulo ket dua nga agnaed idiay Bigbiga, Santiago a nagmaneho iti Honda Dio Scooter a poon iti nakatayan na.
Maipalagip a napasamak ti aksidente idi January 29 ket agpapaabagatan a direksion ni Rendon idi mapapati nga immagaw ti linya ket naidungpar iti nakasinnabet na a truck nga agpa-amiyanan a direksyon.
Nagsagaba iti nakaro a dunor ti ulo ken nadumaduma a paset ti bagi ti biktima a puon ti nakatayanna ken awan pay nagbanbanagan na iti nagluganan na a scooter.
Sangagasut a ribo a pisos iti intulong iti kompanya nga akin-kukua iti nasao a truck iti pamilya ti biktima isu a saanen a maidarum iti nagmaneho a ni Naldo.
Ti sabali a bangir, lima pulo ket innem a ribo a pisos met iti ited ti Partas transportation iti pamilya ni Darwin Duenas nga agtawen ti sangapulo ket pito nga agnaed idiay Barangay Villa Garcia, Sta. Cruz a natay ta nakidinnungpar ti Partas bus nga agpa-amyanan a direksyon idiay Barangay Bayugao Oeste, Sta. Cruz.
Lima pulo ribo a pisos iti ited ti Partas idinto a ti lima ribo a pisos ket ited iti nagmaneho ti bus a dinungpar ni Duenas ken sangaribo a pisos iti ited iti konduktor ti bus tapnu saanen nga agidarum iti pamilya ti biktima.
