VIGAN CITY – Nagmuelta ti sangaribo ket lima gasut a pisos ti drayber ti trak a nasalamaan dagiti kameng ti Provincial Quarantine Office iti checkpoint idiay Brgy. Bio, Tagudin.
Ti driver a ni Marjo Bugtong Morales nga agtawen ti dua pulo ket uppat, baro ken ti pahinante na a ni Mariano Pucti Licnad nga agtawen ti innem a pulo ket pito, naasawaan nga agpada nga agnaed idiay Barangay Man-atong, Suyo ket nagikarga ti dua pulo ket lima a baboy nga awan pulos iti naipakita da a dokumento isu nga inimpound ti provincial quarantine office.
Segun ken ni Provincial Quarantine Officer Martel Quitoriano, masapul a no agipastrek ti baboy ditoy probinsia uray nu naggapu a mismo ditoy uneg ti probinsiya ket adda dagiti naan-anay a dokumento a maipakita kas iti barangay certificate ken dokumento a mangipakita a napalubosan ida ti Livestock ken Veterinary Office a kas mangpaneknek a dagiti maibiyahe a baboy ket nasalun-at da ken saan nga apektado ti African Swine Fever virus.
Inballaag ni Quitoriano a nu uliten pay da Bugtong iti agiserrek kadagiti baboy nga awan iti naan-anay a dokumento da ket kompiskaren danton dagiti karga da.
