Manamnama iti panagsarita inton bigat, July5, 2026 dagiti driver ti tricycle ken motorsiklo a karaman iti aksidente iti national highway idiay Langlangca 2nd, Candon City, Ilocos Sur a napasamak idi kalman, July 3, 2026 .
Dagiti karaman ket ti tricycle wenno TMX 155 a minaneho iti agtawen ti tallopulo ket lima; kaduana ti asawana nga agtawen iti limapulo ket lima; ken dua a menor de edad nga agpapada a taga-Brgy. Caterman, Candon City.
Ti met nagmaneho iti motorsiklo a Black Skygo ket agtawen iti limapulo ket maysa, construction worker, awanan iti driver’s license, kaduana iti agtawen iti duapulo ket dua nga agpada nga agnaed idiay Brgy. Dan-ar, Candon City.
Iti pannaki-uman ti Bombo Radyo Vigan ken ni PLt. Jovelyn Antalan iti Candon City Police Station, apaman a naawatda iti tawag maipanggep iti aksidente ket nagrespondeda ket idi nadanonda iti nasao a lugar, naammoan a bayat iti panagturong iti amianan a direksyon dagiti nagkalugan iti motorsiklo ket nakadinnungparda ti tricycle a dagus a simrek iti national highway a mapapati a naggapu iti maysa a pasken.
Segun ken ni Antalan, iti imbestigasyon ket ti naka-tricycle iti adda nagkuranganna ta saanna nga inuray a mawayaan iti kalsada sakbay a dimmalyasat a rason iti nakadungparanna iti nakamotorsiklo.
Gapu dayta ket nadunor iti agduduma a paset ti bagi dagiti dua a menor de edad a naglugan iti motorsiklo; nagasgasan ti bagi ti driver ken nadunor iti ulo ti muging ti asawana isu a naipanda iti ospital, ken iti agdama ket nasayaaten ti kasasaadda ken nakaawiddan kadagiti pagtaenganda.
Dagiti met naglugan iti motorsiklo ket agpada a nadunor met laeng ta ti inaramat ti driver a helmet ket half face a gappuanan ti pannakadunor iti ulona.
Naammoan nga agpada nga adda naglabsingan dagiti dua a driver ta ti nagmaneho iti tricycle ket adda iti impluwensya iti arak idinto a ti driver ti motorsiklo ket awanan ti driver’s license idi nagmaneho.
No pay kasta, namnamaen ni Antalan a makapagsarita a nasayaat dagiti dua a karaman iti aksidente ta no saanda a ma-settle ket posible a sangwen ti driver iti tricycle iti kaso a reckless imprudence resulting to damage to property and physical injuries.
