VIGAN CITY – Naidungar ti maysa a Mitsubishi Xpander iti concrete barrier iti kalsada a sakupen iti Brgy. Quinarayan, Narvacan ta nagdungsa ti driver-na.
Maibasar ti pakaammo ti Narvacan Municipal Police station ti nagmaneho ti lugan ket ni Christ Charlie Daddon, agtawen ti duapulo ket innem, baro idinto a ti inluganna ket da Crisanta Daddon, agtawen ti uppat a pulo ket pito, naasawaan, Charlie Daddon, agtawen ti limapulo ket dua, naasawaan ken Joy Daddon, agtawen ti duapulo ket dua, balasang nga agpapada nga agnaed idiay 202 Silangan St. Caingin, Meycauayan, Bulacan.
Iti inisyal nga imbestigasyon, agpapabagatan a direksyon ti lugan idin naawanan ti kontrol ti manibela ti driver ket naidungpar iti concrete barrier iti laud a paset iti kalsada.
Naamwan a nagdungsa ti driver bayat ti panagmanehona a gappuanan ti pannakaidungparda.
Nupay kasta, saan a naan-ano ti driver ngem nagsagaba iti minor injuries dagiti kakaduana isu a naipanda iti Ilocos Sur District Hospital Narvacan para iti pannakatamingda ngem insigida da laeng a nakaruar.
Kabayatanna, saan pay a naamwan nu mano ti gatad ti nadadael a paset ti lugan.
