Nagballaag ni Renz Kang, Executive Director ti Ilocos Center for Research Empowerment and Development ti posible a dakes nga epekto iti aglawlaw, salun-at ken pagbiagan dagiti agindeg ti dredging operation iti dadduma a paset ti kabaybayan iti Ilocos Sur kangrunaan iti ili ti Santa ken Caoayan.
Iti pannaki-uman ti Bombo Radyo Vigan ken ni Kang, makatulong ti dredging operation iti rehabilitation dagiti karayan ken tapno maliklikan ti parikut iti layus ngem nasken a masurot dagiti nainget a konsiderasyon.
Iti inaramidda nga assestment mainaig iti dredging operation iti probinsia, saan a husto ti lokasyon dagiti barko ta nasken koma nga iti mismo nga Abra river.
Inlawlawag ni Kang a daytoy nga addang ket posible laeng a mangitunda iti soil erosion ken saan a makontrol ti layus.
Nupay kasta, kiddawna ti pannakaisardeng pay laeng ti dredging operation ken ipablaak iti publiko dagiti naaramid a feasibility studies, environmental impact ken assessment ta daytoy ket maibilang a ‘critical ecosystem’ a nasken nga adalen ti amin.
