Pimmusayen ti nagmaneho iti motorsiklo kalpasan a naidungpar iti maysa a bus iti national highway idiay Barangay San Ramon, Magsingal, Ilocos Sur idi kalman May 9, 2025 iti oras ti alas dose baente singko iti aldaw.
Ti nagmaneho ti Yamaha Sniper 155 ket ni Christian Padera Belena, agtawen iti duapulo ket lima, baro, security guard nga agnaed idiay Lingsat, San Fernando City, La Union idinto a ti nagmaneho iti pink minibus ket ni Primitivo Usita Reupta, agtawen iti pitopulo ket lima, naasawaan nga agnaed idiay Barangay Manzante, Magsingal.
Iti pannaki-uman ti Bombo Radyo Vigan ken ni PLt. Richard Pajo iti Magsingal Municipal Police Station, agpapabagatan ti motorsiklo idinto nga agpaamianan ti bus ket idi nadanonda iti nasao a lugar ket kellaat nga immagaw iti linya ti motorsiklo isu a naidungpar iti minibus.
Na-fracture ti ima ken saka kasta payen a natamaan iti barukong ti driver ti motorsiklo a gappuanan ti pannakaipanna iti Ilocos Sur District Hospital – Magsingal para koma iti pannakatamingna ngem saanen a nakalasat pay.
Naammoan a nakaaramat iti protective gear ti drayber ti motorsiklo ngem gapu ti impact ken pannakatamana ti barukongna ket isun iti nakatayanna.
VIDEO – PLT. RICHARD PAJO
