Natay ti drayber ti motorsiklo iti napasamak nga aksidente iti barangay road idiay Sitio Labut, Barangay Lipit, Cabugao, Ilocos Sur.
Nabigbig ti drayber a ni William Urme Sabinay, agtawen iti tallopulo ket siam, taga-Barangay Arnap, iti nasao nga ili, minanehona ti Euro a motorsiklo.
Agpapadaya ti motorsiklo ket idi magtengna ti nakapasamakan ti insidente kangrunaan iti kurbada a paset ti kalsada ket naawanan iti kontrol ti drayber iti manibela ti luganna ket naidarusdos iti kalsada.
Iti pannaki-uman ti Bombo Radyo Vigan ken ni Police Major Juan Jhayr Maggay, naggapu iti kabangibang a barangay ti drayber a mapapati a nakainom kadua ti asawana.
Idi nadlaw ti asawana a nakainom ket dimsaag iti motorsiklo nga isu met ti gundaway a pinataray ti drayber ti luganna a puon ti pannakatayna.
Nagsagaba iti dunor iti ulo ti drayber nga awan ti suotna a helmet ken naitaray iti ospital ngem dead on arrival.
