VIGAN CITY – Maysa a drayber ti motorsiklo ti natay gapu iti pannakapilidna babaen iti bus idi nag-overshoot iti national highway idiay Barangay Burgos, Sta. Lucia.
Nabigbg ti biktima a ni Ralphe Richee Layugan Pacurza, agtawen iti sangapulo ket walo, agnaed iti Barangay Badas, San Juan, Abra.
Ti met bus ket minaneho ni Arnold Castillo Cruz, agtawen iti limapulo ket lima, agnaed iti Vidal Street Poblacion Bustos, Bulacan.
Agpapa-abagatan ti bus idin ta naawanan iti kontrol ti manibela ti drayber iti motorsiklo nga adda iti bangir a linya ket naguyas agingga a napan iti linya ti bus nga isu met ti pannakaatalna.
Iti pannaki-uman ti Bombo Radyo Vigan ken ni Police Major Roger Baling-oay, posible a na-miscalculate ti drayber ti kalsada agsipud ta kurbada iti nasao a paset a nakadisgrasyaanna.
Naitaray iti ospital ti biktima ngem naideklarar a dead on arrival.
Nakahelmet ti drayber ken saan a nakainom idi napasamak ti aksidente.
Nupay kasta, nakapagpapatang metten ti pamilia dagiti karaman iti aksidente ket tumulongto met ti drayber ti bus iti magastos ti pamilia ti natayan.
