Natay ti maysa a drayber ti motorsiklo gapu iti pannakatukbobna iti trak idiay Barangay Bagani Campo, Candon City, Ilocos Sur.
Nabigbig ti nagmaneho iti drop-side truck a ni Eugenio Paringit Molina, agtawen iti uppat a pulo, taga-Tayum, Abra.
Ti met nagmaneho iti black Honda TMX 155 ket ni Jerome Alos, agtawen iti tallopulo ket walo, taga-Barangay Namaltugan, Sudipen, La Union.
Iti pannaki-uman ti Bombo Radyo Vigan ken ni Police Captain Sanshine Lozano, agpada nga agpapa-abagatan dagiti dua a lugan idin ta nagsardeng ti trak gapu iti trapiko ta adda matartarimaan a rangtay ngem nagderderetso a nagdalyasat ti motorsiklo ket natukbobna ti sarsarunwenna a trak.
Gapu dayta, nadunor ti muging ken akin-kannawan a saka ti nagmaneho iti motorsiklo a naipaagas iti ospital ngem saanen a nakalasat idinto a ti drayber ti trak ket saan a naan-ano.
Nakainom ti drayber ti motorsiklo idi mapasamak ti aksidente.
Kabayatanna, nakasagana met a tumulong ti drayber ti trak iti magastos para iti pannakaimasayag ti biktima.
