Dead on arrival ti maysa a lalaki gapu iti aksidente iti national highway ti Barangay Suso, Sta. Maria, Ilocos Sur a nakairamanan ti motorsiklo ken pickup.
Nabigbig ti drayber ti motorsiklo a ni Bien Jose Roxas Escobar, agtawen iti duapulo ket siam, taga-Barangay Nagpanaoan, Burgos.
Ti met Nissan Navarra pick up ket minaneho ni Loreto Balata Antolin, agtawen iti limapulo ket lima, LGU-San Esteban employee, taga-Barangay Villa Quirino, San Esteban, inluganna da Rhegie Mar Escobar Tan, agtawen iti uppat a pulo ket tallo, Admin Aide III iti LGU-San Esteban, agnaed iti Barangay San Rafael, San Esteban.
Iti pannaki-uman ti Bombo Radyo Vigan ken ni Police Major Macario Dulawan Jr., daldalyasat dagiti dua a lugan iti national highway nga agpa-amianan a ti motorsiklo ket sarsarunwenna ti pickup.
Idi madanonda ti nakapasamakan ti aksidente, nagsenyal ti pick up nga agpakannigid, ngem nag-overtake ti motorsiklo ket napan iti bangir a linya isu a naidungpar iti front left bumper ti pick up.
Gapu dayta, nadunor ti nadumaduma a paset ti bagi ti drayber ti motorsiklo a naipaagas iti ospital ngem saanen a naisalakan ti biagna.
Nupay kasta, nakasagana met nga agipila iti kaso ti pamilia ti drayber a natay.
