Natukkol ti akin-kannawan a saka ti nagmaneho ti motorsiklo kalpasan a nadungparna iti maysa a wing van truck iti national highway idiay Barangay Caburao, Santiago.
Ti driver iti Isuzu Wing Van truck ket agtawen iti uppat a pulo ket tallo, naasawaan, addaan ti driver’s license nga agnaed idiay Barangay Malabbaga, La Paz, Abra.
Ti met nagmaneho ti blue Honda Wave a motorsiklo ket lalaki nga agtawen iti duapulo ket dua, college student, addaan ti driver’s license nga agnaed idiay Barangay Bagbagotot, Banayoyo.
Iti pannaki-uman ti Bombo Radyo Vigan ken ni PEMS Iris Lois Pamaran a MESPO iti Santiago Municipal Police Station, agpapa-amianan a direksyon ti wing van idinto nga agdaldalyasat iti bangir a direksyon ti motorsiklo ket idi nadanonda iti intersection nga agturong iti ili ti Banayoyo, nagsikko iti kannigid ti motorsiklo a gappuanan iti pannakadungparna iti wing van.
Segun ken ni Pamaran, gapu iti impact ket nadundunor ti driver ti motorsiklo ken natukkol iti akin-kannigid a sakana isu a naipan iti Candon General Hospital para iti pannakatamingna ket iti agdama, agpapalaing pay laeng.
Naammoan nga idi napasamak iti aksidente ket naka-inom iti arak ti driver ti motorsiklo ta mapapati a naggapu iti maysa a pasken.
Gapu iti pasamak ket nagpalagip ni Pamaran kadagiti motorista a liklikan iti agmaneho no naka-inom tapno saan a maaksidente.
