Nadunor ti maysa a drayber ti motorsiklo gapu iti pannakatukbobna iti wing van truck iti national highway ti Barangay Suso, Sta. Maria, Ilocos Sur.
Nabigbig ti drayber ti Suzuki Skydrive a motorsiklo a ni Rowel Jacob Duro, agtawen iti uppat a pulo ket lima, taga-Barangay Nalvo, Sta. Maria.
Ti met nagmaneho iti Fuso Wing Van Truck ket ni Mark Anthony Yanes Bundal, agtawen iti duapulo ket pito, taga-Barangay Suklayin Baler, Aurora.
Agpapa-abagatan ti motorsiklo idin ta natukbobna ti likudan a paset ti wing van trak a nakaparking iti outer lane.
Gapu dayta, nadunor ti nadumaduma a paset ti bagi ti drayber ti motorsiklo a naipaagas iti Ilocos Sur District Hospital – Narvacan para iti pannakatamingan.
Saan met a naan-ano ti drayber ken pasahero ti wing van truck.
Natakuatan a ti drayber ti motorsiklo ket nakainom idi mapasamak ti insidente.
