Maysa a drayber ti motorsiklo ti nadunor iti napasamak nga aksidente idiay Barangay Casilagan Sur, Banayoyo, Ilocos Sur.
Ti Honda Click 125 motorcycle ket minaneho ti maysa a lalaki nga agtawen iti duapulo ket dua, taga-Barangay Casilagan Sur.
Kabayatanna, ti met 10-wheeler dump truck ket minaneho ti lalaki nga agtawen iti tallopulo ket tallo, taga-Barangay Elefante.
Agpapalaud ti motorsiklo idinto nga adda iti bangir a linya ti dump truck.
Idi madanonda ti kurbaan a paset ti kalsada, nag-overshoot ti napaspas tarayna a motorsiklo ket inagawna ti linya ti dump truck.
Gapu dayta, nadungpar ti motorsiklo ti pilid iti sango ti dump truck.
Nadunor ti ulo ken nadumaduma a paset ti bagi ti drayber a naipaagas iti ospital para iti naan-anay a pannakatamingna idinto a saan met a naan-ano ti drayber ti dump truck.
