Nadunor iti ulo ti nagmaneho iti motorsiklo gapu iti pannakaidungparna iti alad iti provincial road idiay Barangay Laslasong Sur, Sta. Maria, Ilocos Sur idi rabii, March 21, 2026.
Ti nagmaneho iti puraw a Yamaha Mio 125 motorcycle ket agtawen iti duapulo ket tallo, baro, construction worker nga agnaed idiay Barangay Gusing, Sta. Maria.
Sakbay iti insidente ket agturong ti motorsiklo iti daya a direksyon idi nadanonna iti nasao a lugar ket naawanan iti kontrol iti manibelana a gappuanan iti panagturongna iti kannawan a paset ti kalsada ken nagderetso iti kongkreto nga alad.
Gapu dayta ket nagsagaba iti dunor iti ulo isu a naipan iti Ilocos Sur District Hospital – Narvacan para iti insigida a pannakatamingna ket naammoan a naka-inom iti arak idi napasamak iti aksidente.
