Dunor iti ulo ken gasgas iti nadumaduma a paset ti bagi ti sinagrap ti maysa a drayber ti motorsiklo a naaksidente iti barangay road ti Pangpangdan, Sto. Domingo, Ilocos Sur.
Ti drayber ket agtawen iti duapulo ket dua, construction worker, taga-Barangay Padu Chico, minanehona ti black a Yamaha Aerox motorcycle.
Iti pannaki-uman ti Bombo Radyo Vigan ken ni PLT. Benito Ponce Jr., agawiden a naggapu iti trabahona ti drayber ket mapapati a saanna a nakontrol ti manibela ti lugan idi madanonna ti agsikko a paset ti kalsada.
Gapu dayta, naigalis ti motorsiklo iti sementado a dalan ta matutudo iti dayta a gundaway.
Naipaagas iti ospital ti drayber nga ita ket adda metten iti natalged a kasasaad.
Awan ti suot a helmet ti drayber idi napasamak ti aksidente.
