Nadunor ti maysa a rider kalpasan a naidungpar ti minanehona a motorsiklo iti makasinnabetna a motorsiklo iti provincial road idiay Barangay Luna, Burgos, Ilocos Sur.
Ti Honda TMX 155 a motorsiklo ket minaneho ti lalaki nga agtawen iti duapulo ket pito, agnaed iti Barangay Lucban, Burgos.
Kabayatanna, ti met Honda XRM 110 ket minaneho ti lalaki nga agtawen iti duapulo ket uppat, agnaed iti Barangay Patac, iti probinsia.
Daldalyasaten ti TMX 155 ti agpadaya a direksion idinto a ti Honda XRM 110 ket agdaldalyasat iti bangir a linya.
Idi madanonda ti nakapasamakan ti aksidente, immagaw ti linya ti TMX 155 ket nadungparda iti Honda XRM.
Gapu dayta, nadunor ti kannigid a paset ti tian ti drayber ti XRM a naipaagas iti ospital para iti pannakatamingna.
Kabayatanna, ti met drayber ti Honda TMX 155 ket saan a nadangran ken saanen a nagpaagas.
Naduktalan a nakainom ti drayber ti XRM idi mapasamak ti aksidente.
