Nadunor ti nadumaduma a paset ti bagi ti maysa a drayber ti motorsiklo a nakadungpar iti aso iti barangay road idiay Sitio Lussoc, Barangay Manzante, Magsingal, Ilocos Sur.
Nabigbig ti nagmaneho iti Black Honda Click 125 motorcycle a ni Joy Tabin Uganiza, agtawen iti tallopulo ket maysa, taga-Barangay Dacutan, Magsingal.
Agpapa-abagatan ti motorsiklo idin ta bigla a bimmallasiw ti aso, ket pinadas a lisyan ti drayber ngem naawanan iti kontrol ti manibelana ket nadunor ti nadumaduma a paset ti bagina isu a naipaagas iti ospital.
Iti pannaki-uman ti Bombo Radyo Vigan ken ni PLT. Richard Pajo manipud iti Magsingal Police Station, nakainom ti drayber idi mapasamak ti aksidente ken awan ti suotna a helmet.
Awan pay laeng ti nangaklun no asino ti akin-taraken ti aso a nadungpar ken nagpalagip ni Pajo kadagiti pet owner nga igalutda dagiti asoda tapno saanda a makadisgrasya.
