Pimmusayen ti drayber ti motorsiklo a naaksidente iti national highway ti Barangay Poblacion, Sto. Domingo, Ilocos Sur.
Karaman iti aksidente ti maysa a utility close van a minaneho ti maysa a lalaki nga agtawen iti tallopulo ket innem, taga-Barangay Immayos Norte, San Juan.
Ti met motorsiklo ket minaneho ti biktima a lalaki nga agtawen iti duapulo, kinalubbonna ti lalaki nga agtawen iti sangapulo ket siam, agpada a taga-Barangay Calautit, Sto. Domingo.
Maibasar iti CCTV footage, agpapa-amianan ti closed van idinto nga agpalaud a sumrek iti national highway ti motorsiklo.
Idi nadanonda ti nakapasamakan iti aksidente, nadungpar ti motorsiklo ti closed van kabayatan ti panagballasiwna iti kalsada a saan pulos a nagsignal.
Nadunor dagiti nagkalubbon a naipaagas iti ospital para iti pannakatamingda ngem saan a nakalasaten ti drayber idinto a natalged met ti kasasaad ti backrider.
Kabayatanna, saan a naan-ano ti drayber ti closed van.
