Pimmusayen ti drayber ti motorsiklo a nadungpar ti trak iti national highway ti Barangay San Rafael, San Esteban, Ilocos Sur.
Ti motorsiklo ket minaneho ti lalaki nga agtawen iti tallopulo ket lima, delivery rider, agnaed iti Barangay Cappa-Cappa.
Ti met aluminum closed van truck ket minaneho ti lalaki nga agtawen iti uppat a pulo, agnaed iti San Nicolas, Candon City.
Iti pannaki-uman ti Bombo Radyo Vigan ken ni Police Captain Bryan Cabe, agpada nga agpapa-abagatan dagiti dua a lugan ngem idi nadanonda ti nakapasamakan ti aksidente, nagsignal nga agpakannigid ti motorsiklo.
Nadlaw met ti trak a sumarsaruno iti likudanna ti motorsiklo isu nga imbumbuntogna ti nagpataray ngem nagdinnungpar latta ti sango ti closed van ken likod a paset ti motorsiklo.
Gapu dayta, naawanan ti kontrol ti drayber iti motorsiklona ket naatalan ti trak ti motorsiklo.
Nadunor ti nadumaduma a paset ti bagi ti drayber ti motorsiklo ket naipaagas iti ospital ngem pimmusay bayat ti pannakatamingna.
Mapapati a nag-internal bleeding ken natukkol ti paragpag ti drayber ti motorsiklo a puon ti nakatayanna.
