Dead on arrival ti drayber ti motorsiklo a naatalan iti trailer truck iti national highway idiay Barangay Rizal, Cabugao, Ilocos Sur.
Ti Isuzu trailer ket minaneho ti lalaki nga agtawen iti uppat a pulo ket innem, taga-Pasuquin, Ilocos Norte, inluganna ti lalaki nga agtawen iti limapulo ket tallo, taga-Barangay Cadaratan, Bacarra.
Ti met Suzuki Raider motorcycle ket minaneho ti lalaki nga agtawen iti duapulo ket tallo, taga-Barangay Bato, Cabugao.
Kabayatanna, ti Yamaha MioI 125 ket minaneho ti lalaki nga agtawen iti duapulo, taga-Barangay Dardarat, Cabugao, backride-na ti maysa a babai a taga-Barangay Margaay, iti nasao nga ili.
Iti pannaki-uman ti Bombo Radyo Vigan ken ni Police Major Juan Jhayr Maggay, agpapa-abagatan ti trailer idinto nga agpa-amianan met dagiti dua a motorsiklo.
Nasagid ti Raider ti Mio idi pinadasna daytoy nga i-overtake ket naiderderetso a naidungpar iti sumungad a trailer truck isu a naatalan a rason ti pannakatayna.
Nadunor ti ulo drayber ti Raider ket naipaagas iti ospital ngem naideklarar a dead on arrival.
Saan met a naan-ano ti nagmaneho ti trailer ngem dagiti nagkalubbon iti Mio ket nagsagrap met laeng iti dunor.
