VIGAN CITY – Maysa ti natay idinto a maysa iti nadunor iti napasamak nga aksidente iti national highway idiay Barangay Baliw, San Juan a nakairamanan ti maysa kurong-kurong ken kotse.
Nabigbig ti natay a nagmaneho iti kurong-kurong a ni Samson Rabaja Guzman, agtawen iti uppat a pulo ket innem, kaduana ti putotna a menor de edad, agpada a taga-Barangay Saoang, San Juan.
Ti met nagmaneho iti kotse ket ni Marvin Viejo Handoc Jr., agtawen iti uppat a pulo ket walo.
Iti pannaki-uman ti Bombo Radyo Vigan ken ni Police Major Benjamin Raquedan, agpada nga agpapaabagatan ti dua a lugan idin ta natukbob ti napaspas ti patarayna a kotse ti sarsarunwenna a kurong-kurong.
Saan a nadlaw ti nagmaneho iti kotse ti kurong-kurong ta awan ti tail light na daytoy.
Naipaagas met iti ospital dagiti naglugan iti kurong-kurong para ti naan-anay a pannakatamingda a gappuanan ti pannakatay ti driver idinto a saan a naan-ano ti nagmaneho iti kotse.
Nupay kasta, napagtulagan metten ti pamilia dagiti karaman iti aksidente a saandan nga idanon pay daytoy iti korte.
