Nadunor ti drayber ti kurong-kurong a dinungpar ti trak iti national highway idiay Barangay Lapting, San Juan, Ilocos Sur.
Nabigbig ti nagmaneho iti kurong-kurong a ni Angel Sabio Sajor Jr., agtawen iti uppat a pulo ket pito, taga-Barangay Bonifacio, Cabugao, Ilocos Sur.
Ti met nagmaneho iti GIGA truck ket ni Rodrigo Sabada Benitez Jr., agtawen iti uppat a pulo ket tallo, taga-Zone 3, Sitio Calaocan, Kita-kita, San Jose City, Nueva Ecija.
Iti pannaki-uman ti Bombo Radyo Vigan ken ni PLT. Reynald Ramos, agpapa-amianan dagiti dua a lugan ket idi nadanonda ti nakapasamakan ti insidente, saan a nakontrol ti trak ti minanehona a lugan ket nadungparna ti kurong-kurong nga adda iti igid ti kalsada.
Gapu dayta, nadunor ti ulo ken nadumaduma a paset ti bagi ti nagmaneho iti kurong-kurong idinto a saan a naan-ano ti drayber ti trak.
Aminado ti drayber ti trak a naiturogna isu a saanna a napuotan a nadungparna ti kurong-kurong.
Nupay kasta, natalgeden ti kasasaad ti drayber ti kurong-kurong ken baklayen amin ti drayber ti trak ti gastusenna nga agpaagas.
