VIGAN CITY – Sangagasut limapulo a ribo a pisos ti napagtutulagan a bayadan ti nagmaneho ti kotse a nakadungpar kadagiti aglive-in partner idiay Panay Norte, Magsingal.
Immunan a nagkiddaw ti pamilia dagiti biktima a da Rudy Reintegrado, agtawen ti duapulo ket pito ken ti live-in partner-na a ni Marilyn Natividad ti tallogasut a ribo a pisos ta saandan a kayat ti agidarum ken kayatda laengen a matulonganda iti gastusenda nga agminatay ken dagiti mabayadan iti ospital.
Segun ken ni Mervin Bilas Tangca, agtawen ti uppat a pulo ken agnaed idiay Brgy. Tabba, Pamplona, Cagayan nga isu ti nagmaneho ti kotse, saanna a kabaelan nga ipaay ti kidkiddawen a gatad ti pamilia ti biktima agsipud ta dumaldalan iti chemotheraphy ti asawana nga adda sakitna a kanser.
Nupay kasta, agtaltalinaed pay laeng iti Intensive Care Unit ni Natividad para iti naan-anay a pannakatamingna.
