Natay ti maysa a drayber kalpasan a naidungpar ti minanehona a motorsiklo iti SUV iti national road idiay Barangay Ampandula, Santa, Ilocos Sur.
Ti SUV ket minaneho ti lalaki nga agtawen iti uppat a pulo ket dua, agnaed iti Barangay San Julian Sur, Vigan City.
Ti met motorsiklo ket minaneho ti lalaki nga agtawen iti tallopulo ket innem, agnaed iti Barangay Bulag Centro, Bantay.
Iti pannaki-uman ti Bombo Radyo Vigan ken ni PMaj. Rovic Nelmida, immagaw ti motorsiklo iti linya ti SUV isu a nagdinnungparda.
Mapapati pay a napaspas ti pataray dagiti dua a lugan idi mapasamak ti aksidente.
Gapu iti pannakaipurwak ti drayber ti motorsiklo idi mapasamak ti panagdinnungpar, natukkol ti kannawan nga abagana ken nagasgasan ti nadumaduma a paset ti bagina.
Naipaagas iti ospital ngem naideklara a dead on arrival idinto a saan a nadangran ti drayber ti SUV.
Nakainom ti drayber ti motorsiklo idi napasamak ti aksidente.
