Dead on arrival ti maysa a drayber iti panagdinnungpar ti motorsiklo ken SUV iti national highway ti Barangay Puspus, Bantay, Ilocos Sur.
Ti Yamaha Aerox motorcycle ket minaneho ti agtawen iti duapulo ket pito, taga-Barangay Poblacion, Sta. Catalina, backrider-na ti agtawen iti tallopulo a taga-Barangay Sinabaan, Bantay.
Ti met Mitsubishi Montero ket minaneho ti agtawen iti uppat a pulo ket maysa, taga-Casiber, Santa.
Napaspas ti pataray ti motorsiklo nga agpadaya iti inner lane ket inovertakeanna ti trak sakbay a nagsubli iti linya.
Idi madanon ti nakapasamakan ti aksidente, nag-flasher ti agpapa-amianan nga SUV ket nagsikko iti kannigid nga isu ti puon ti panagdinnungparda.
Nagsagaba iti nakaro a dunor ti drayber ti motorsiklo a naitaray iti ospital ngem saan a naispal ti biagna.
Ti met backrider ket nagsagaba iti dunor ti bagina isu a naipaagas iti ospital para iti naan-anay a pannakatamingna idinto a saan a naan-ano ti drayber ti SUV.
