Maysa a drayber ti natay iti panagdinnungpar ti motorsiklo ken sedan iti national highway ti Barangay Becques, Tagudin, Ilocos Sur.
Nabigbig ti nagmaneho iti Mitsubishi Mirage a ni Don Carlo Lozano Gregorio, agtawen iti tallopulo ket tallo, taga-Barangay Poblacion Norte, Sta. Cruz.
Ti met nagmaneho iti Mio i125 a motorsiklo ket ni Rony Mangaoang Lardizabal, agtawen iti limapulo, dati nga OFW, taga-Barangay Bitalag, Tagudin.
Iti pannaki-uman ti Bombo Radyo Vigan ken ni Police Major Kleyvan Paycao Dalang, agpapa-amianan ti sedan idin ta immagaw ti linya ti motorsiklo ket nagdinnungparda.
Nadunor ti drayber ti motorsiklo ket dead on arrival idi maitaray iti ospital.
Saan met a naan-ano ti drayber ti sedan a naipan met laeng iti ospital para iti medico-legal examination.
Nakainom ti drayber ti motorsiklo idi mapasamak ti aksidente ken saan nga authorized helmet ti inaramatna.
