Nadunor ti nadumaduma a paset ti bagi ti maysa a drayber ti traysikel a nadungpar iti pick up iti national highway ti Barangay Libtong, Tagudin, Ilocos Sur.
Nabigbig ti drayber ti traysikel a ni Rodrigo Leal Cuaresma, agtawen iti innem a pulo ket innem, agnaed iti nasao a lugar.
Ti met nagmaneho9 iti pick up ket ni Brando Cortez, agtawen iti duapulo ket siam, taga-Barangay Paing, Bantay.
Aggapu iti agsinnumbangir a linya dagiti dua a lugan ket idi magteng ti nakapasamakan ti insidente, bigla a nagsikko ti agpapa-abagatan a traysikel isu a nadungpar daytoy ti pick up.
Gapu dayta, natinnag ti drayber ti traysikel iti kalsada idinto a saan met a naan-ano ti drayber ti pick up ken dagiti pasaherona.
Naipaagas ti drayber ti traysikel iti ospital para iti naan-anay a pannakatamingna.
