Nadunor ti maysa a drayber iti panagdinnungpar ti maysa a multi-purpose vehicle ken motorsiklo iti national highway ti Barangay Paras, Candon City, Ilocos Sur.
Ti MPV ket minaneho ti maysa a lalaki nga agtawen iti duapulo ket pito, agnaed iti Barangay Calaoa-an.
Ti met motorsiklo ket minaneho ti maysa a lalaki nga agtawen iti uppat a pulo, construction worker, agnaed iti Barangay Caterman.
Maibasar iti inisial nga imbestigasyon, agpapa-abagatan ti MPV idin ta bigla a simrek iti roadway ti motorsiklo a naggapu iti maysa a Resto Bar isu a nagdinnungpar dagiti dua a lugan.
Naipaagas iti ospital ti drayber ti motorsiklo gapu iti dunor a sinagrap ti nadumaduma a paset ti bagina ken naduktalan a nakainom idi napasamak ti aksidente.
Saan met a naan-ano ti drayber ti MPV.
