Nakaro a dunor iti saka ti sinagrap ti maysa a drayber gapu iti panagdinnungpar ti motorsiklo ken van idiay Barangay Maynganay Norte, Sta. Maria, Ilocos Sur.
Ti drayber ti motorsiklo ket agtawen iti duapulo ket lima a taga-Aquib, Narvacan idinto a ti drayber ti van ket agtawen iti duapulo ket siam a taga-Pampanga.
Agpapa-amianan ti motorsiklo ket idi magtengna ti nakapasamakan ti aksidente, nagdinnungparda ti agpapa-abagatan a van.
Naipaagas iti ospital ti drayber ti motorsiklo gapu ti nakaro a pannakadunor ti akin-kannigid a sakana idinto a saan a naan-ano dagiti naglugan iti van.
Natakuatan a nakainom ti drayber ti motorsiklo idi mapasamak ti aksidente.
Kabayatanna, nakasagana met a tumulong ti drayber ti van kadagiti magastos a pagpaagas ti drayber ti motorsiklo.
