Nadunor ti agtawen-iti-duapulo ket dua a lalaki a nagmaneho iti motorsiklo gapu iti aksidente a napasamak iti national highway ti Barangay Guimod, Bantay, Ilocos Sur.
Ti drayber ket maysa a fastfood crew, agnaed iti Barangay Napo, Sto. Domingo.
Nairaman pay iti aksidente ti maysa a kotse a minaneho ti babai nga agtawen iti duapulo ket uppat, agnaed iti Barangay Sabangan, San Juan.
Iti pannaki-uman ti Bombo Radyo Vigan ken ni PLT. Ronie Corpuz, agpapa-amianan ti kotse idinto nga agpapa-abagatan ti motorsiklo.
Idi nadanonda ti nakapasamakan ti aksidente, nagsikko ti kotse iti kannigid isu a napan iti bangir a linya ket nagdinnungparda ti sumungad a motorsiklo.
Gapu dayta, nadunor iti ulo ti drayber ti motorsiklo ket naipaagas iti ospital para iti pannakatamingna idinto a saan a naan-ano ti drayber ti kotse.
Nakainom ti drayber ti motorsiklo idi mapasamak ti aksidente.
Kabayatanna, naituding met ti panagpatang ti agsinnumbangir a partido para iti pannakaurnos dagiti mabayadan.
