Maysa a drayber ti nadangran iti napasamak nga aksidente a nakairamanan dagiti 3 a lugan iti national highway ti Barangay San Juan, Sta. Lucia, Ilocos Sur.
Karaman iti aksidente ti maysa a Euro motorcycle a minaneho ti maysa a babai nga agtawen iti duapulo, taga-Barangay Bani, Sta. Lucia.
Ti Mitsubishi Xpander ket minaneho ti maysa a lalaki nga agtawen iti duapulo ket siam, taga-Barangay Maligaya, Bonuan Gueset, Dagupan City.
Ti met Toyota Corolla ket minaneho ti maysa a lalaki nga agtawen iti tallopulo ket dua, taga-Barangay San Jose, Candon City.
Maibasar iti CCTV footage, agpapa-amianan dagiti 3 a lugan a ti akin-sango ket ti kotse a sarsarunwen met ti motorsiklo.
Temporaryo a nagsardeng ti motorsiklo gapu iti matartarimaan a kalsada ket nagsikko a mapan iti shoulder lane ngem saanna a nadlaw ti dimmalan a Mitsubishi Xpander isu a nagdinnungparda.
Natwang ti motorsklo ket naidungpar iti kannawan a paset ti kotse.
Nadunor ti nagmotorsiklo ket naipaagas iti ospital para iti pannakatamingna idinto a saan a naan-ano dagiti drayber ti MPV ken kotse.
