Agpada a nadangran ti drayber ken pasahero ti kotse a nagbaliktad iti Heroes Bypass Road, Barangay Parioc 1st, Candon City, Ilocos Sur.
Ti drayber ket lalaki nga agtawen iti innem a pulo ket walo, inluganna ti maysa a negosiante a babai nga agtawen iti uppat a pulo ket walo nga agpada a taga-Barangay Tablac.
Iti pannaki-uman ti Bombo Radyo Vigan ken ni PLT. Jovelyn Antalan, agpapa-amianan ti kotse idin ta nagdungsa ket saanna a nakontrol ti minanehona a lugan ket naidungar iti metal streetlight a poste iti center island ti kalsada ket nagbaliktad ti luganda.
Sakit ti barukong ti agalen dagiti karaman ken adda dunor ti drayber isu a naipaagasda iti ospital ngem nakaruarda met laengen iti agdama.
Natakuatan pay a dagiti karaman ket naggapuda idiay Manila a napan gimmatang iti lakoda ket agawiddan idi mapasamak ti aksidente.
