Dua ti nadangran iti panagdinnungpar dagiti dua a motorsiklo idiay Barangay Namnama, Sinait, Ilocos Sur.
Ti nagmaneho iti Yamaha Mio1 125 a motorsiklo ket ni Arvin Guzman Aycayde, agtawen iti tallopulo ket maysa, Barangay Treasurer, backrider ni Mark Angelo Gajeton Yadao, agtawen iti duapulo ket tallo, agpada a taga-Barangay Dadalaquiten, Norte.
Ti met nagmaneho iti Honda Click 125 a motorsiklo ket ni Mark John Ilmeng Iloreta, agtawen iti sangapulo ket siam, taga-Barangay Battog, Sinait.
Dagiti karaman iti aksidente ket agpapada nga awan ti suotda a helmet.
Iti pannaki-uman ti Bombo Radyo Vigan ken ni PLT. Elmer Asistin, Deputy Chief of Police ti Sinait Police Station, agpapa-amianan dagiti dua a lugan, ket idi agsikko nga agpakannigid ti motorsiklo a minaneho ni Aycayde, nadungpar ti sumarsaruno kenkuana a napaspas patarayna a motorsiklo ni Yadao.
Nadunor ti akin-kannawan a saka ti backrider ti Mio idinto a ti drayber ti Honda Click ket na-fracture ti ulona.
Nakainom ti drayber ti Honda Click idi mapasamak ti aksidente ket ita, maob-obserbaran iti balay pagagasan ta nadaraan ti utekna.
