VIGAN CITY – Dead on Arrival ni Ilocos Sur Polytechnic State College President ken dati a University of Northern Philippines President Dr. Gilbert Arce ta karaman iti karambola dagiti lugan iti national highway idiay Barangay Mabilbila Norte, Santa, Ilocos Sur a nakairamanan ti maysa a papasahero a bus, aluminum van ken pick-up.
Ti nagmaneho iti Transport Pro Passenger Bus ket ni Alvaro Yarte Tumbaga, agtawen ti uppat a pulo ket walo, naasawaan, nga agnaed idiay Brgy. Battog Sinait; ti nagmaneho iti Aluminum van ket ni Dennis Carolino Alcantara, agtawen ti uppat a pulo ket maysa, naasawaan nga agnaed idiay Brgy. Amandiego, Alaminus, Pangasinan; ken ti nagmaneho iti Ford Raptor Black a ni Dr. Gilbert Ribero Arce, agtawen ti limapulo ket uppat, baro, presidente iti ISPSC nga agnaed idiay Brgy. Barraca, Vigan City.
Iti pannaki-uman ti Bombo Radyo Vigan ken ni Police Captain Mark Bryan Corpuz iti Santa Municipal Police Station, agturong iti bagatan a direksyon ti bus ken aluminum van idinto a ti pick-up ket aggapu iti bangir a linya.
Segun ken ni Corpuz, immagaw ti linya ti pick-up isu a nasagidna iti aluminum van ket simmaruno a naidungpar iti bus. Limmisi ti aluminum van ngem naidungpar iti maysa a pagtaengan idinto a ti bus ket naidungpar met laeng iti maysa a pagtaengan.
Gapu dayta, nadunor ti driver ti bus ken dadduma a pasahero isu a naipanda iti Santa Rural Health Unit ken Metro Vigan Hospital, Bantay para iti pannakatamingda, ngem ti driver ti pick-up a ni Dr. Arce ket naideklarar a dead on arrival, idinto a ti driver ti aluminum van ket saan a naan-ano.
Nupay kasta, agtultuloy iti imbestigasyon inaig iti nasao a pasamak.
VOICE OF POLICE CAPTAIN MARK BRYAN CORPUZ
