Nangbukel ti Department of Public Works and Highways (DPWH) iti Anti-Graft and Corruption Practices Committee tapno maimbestigaran dagiti anomalya iti flood control project kadagiti nadumaduma a paset ti pagilian.
Gagem ti komite a mangipatungpal ti naun-uneg nga imbestigasion kadagiti flood control project ken posible a korapsion nga inaramid dagiti sumagmamano nga opisial ken empleado ti DPWH kas maitunos iti naipaulog a Department Order No. 166 s. 2025 a pinirmaan ni resigned DPWH Secretary Manuel M. Bonoan.
Naituding a makikammayet ti komite kadagiti dadduma pay nga ahensia ken dagiti pannakabagi ti linteg tapno natibtibker ken naur-urnos ti panangur-or kadagiti impormasion manipud iti prosecution mainaig kadagiti nadakamat a flood control project.
Impasigurado ti opisial nga asino man a korap iti uneg ti ahensiada ket madusa.
