Insuko ti Department of Public Works and Highways (DPWH) iti Office of the Ombudsman ti amin a computer ken files nga inaramat ni dati a DPWH Undersecretary Maria Catalina Cabral kas panangsurot ti Subpoena Duces Tecum iti Ombudsman wenno ti subpoena tapno agipasa kadagiti dokumento wenno ebidensya.
Segun ti DPWH, karaman kadagiti naipasa a dokumento ti records ken request for reconsideration maipanggep ti programming ti National Expenditure Program (NEP) iti napalabas a sangapulo a tawen.
Dagiti nasao nga alikamen ket insuko iti sumagmamano a DPWH undersecretaries ken sinelyoanen ti Ombudsman para iti digital forensic examination.
Kinuna met ni Assistant Omnudsman Mico Clavano nga agtalinaed a selyado dagiti gamit bayat a maisaysayangkat ti panagadal.
Innayonna nga interesado a maala ti Ombudsman ti cellphone ni Cabral no man pay sakup dayta iti imbestigasyon ti Philippine National Police (PNP).
