Imbutaktak ni dati a Bulacan district engineer Brice Hernandez ti mapapati a panagbibinningay dagiti engineer iti Department of Public Works and Highways iti pastrek manipud kadagiti ghost project.
Dayta ket kalpasan a naipaayan ni Hernandez iti legislative immunity kasukat ti panangibutaktakna iti manera kadagiti ghost project iti distritoda kabayatan ti panagdengngeg ti Senate Blue Ribbon Committee.
Iti imbutaktak ni Hernandez, dinakamatna ti dati a boss-na a ni ex-DPWH Bulacan engineer Henry Alcantara nga adda 40 percent a bingay manipud iti pastrekna, idinto a sag-20 percent met kada Engineer Jaypee Mendoza ken Engineer Paul Duya.
Innayon ni Hernandez a ti panagpangato ti ‘grease money’ ket maysa kadagiti rason no apay a nagdesisionda nga agaramid iti ghost project.
Pinaglibakan met ni Alcantara dagiti pammabasul ken blangko isuna no sino ti maibagbaga a proponent.
