Pinalagipan manen ni Transportation Secretary Giovanni Lopez dagiti drayber ti pampubliko a lugan nga isardengda ti mangkikil ken manggundaway kadagiti pasahero, lokal man wenno gangannaet a turista, iti baet ti ingingina ti presio ti langis.
Imbingay ti Department of Transportation ti kapadasan dagiti dadduma a turista a Taiwanese a mapapati a nangsingir iti P9,600 ti maysa a drayber manipud iti Ninoy Aquino International Airport a mapan Manila, imbes a P500 laeng koma.
Imbilin ni Lopez iti Land Transportation Franchising and Regulatory Board ken Land Transportation Office a dagus a tiliwen ken pilaan iti kaso a kriminal dagiti drayber a matiliwan a manggungundaway kadagiti pasaheroda.
Mabalin pay a masuspenso wenno makanselar ti prangkisa dagiti transport operator a karaman iti kastoy nga aramid.
