Imbilin ni Department of Transportation Acting Secretary Giovanni Lopez a maibabawi ti panagaramat iti protocol licensed plates nga inted ti ahensia.
Iti memorandum nga inruar ti DOTr, nakailanad ti panang-revoke ti amin a dati a nairuar a protocol licensed plates para kadagiti opisial ti DOTr Central Office ken sectoral ken attached agencies ken corporation tapno maliklikan ti panagabuso iti panagaramat iti special government licensed plates.
Malaksid dayta, maipasubli dagiti nasao a plaka iti Land Transportation Office ken naibilin kadakuada nga i-review ken lawlawagen dagiti sumagmamano a probision ti Joint Administrative Order 2024-001 ken ipasa ti updated inventory dagiti amin a plaka.
Iparit pay ti Acting Secretary ti panagaramat iti wang-wang, blinkers, ken dadduma a signaling wenno flashing devices dagiti opisial ti Central Office ken dagiti Sectoral ken Attached Agencies ken Corporations kas mayataday iti Administrative Order ni Presidente Ferdinand Marcos Jr.
