VIGAN CITY – Inlawlawag ni Municipal Agriculture and Fishery Council Chairman Willliam Pagay Sr. a masapul nga ipakaamo nga insigida iti kaasitgan nga opisina ti Bureau of Fishery and Aquatic Resources nu adda dagiti aniyaman a klase ti ikan a maisadsad iti baybay kadagiti naduma-duma a lugar ditoy probinsiya ta ad-adda nga isuda iti makaammo nu anya ti rumbeng nga aramiden da.
Dayta ket mainaig iti natay a dolphin a nasarakan dagiti tattao iti igid ti baybay idiay Puro, Magsingal idi naminsan nga aldaw.
Segun ken ni Barangay Captain Norlando Tabalanza, sibibiyag pay laeng ti dolphin idi damo a makita da ngem kalpasan iti sumagmamano a minutos ket natayen isu nga in-inut a naipaigid iti baybay.
Atapen ni Tabalanza a natay ti ikan ta nadunor iti naduma-duma a paset iti bagi na ken mapapati nga agdagsen ti sangagasut lima pulo a kilo.
Napan met kinita dagiti kameng ti BFAR nu anya a klase ti dolphin ti natay ken nu anya ti pudno a rason iti pannakatay na.
